King pacamalan ming labuad a kecaming pibaitan,
nung nucarin ing canauan asnang casakit acamtan,
asnong casakit pagcasya ring salaping panakitan,
lalung lalu na nung pane micacamal ing panyaluan.
King pacamalan ming bangsa a bangsa ming Pilipinas,
nung nucarin ding memalen manaya lang ustung ablas,
at manalig ketang ustu a palacad na ning batas,
at e caretang dayucduc king gubiernu manarampas.
King pacamalan ming lugal a kecaming pagcarinan,
nung nucarin dacal taung magcasakit king cabilian,
uli ra ring taung ganid king upaya at pibandian,
inya dacal a mabibie pane lipit king cabiayan.
King pacamalan ming labuad a pigcalub ning Mengabus,
nung nucarin angga ngeni dacal taung macalunus,
manintunan mangabayat milamnan ya sa’ ing dungus,
king pangaldoldo cabiayan maninasa sa’ng micabius.
E. P. D.