Anyang mikit kata, tineydyer kata pa,
ala kung liniwan, nune abe daka,
alang aldo’t bengi, komustaan kata,
oba’t kauli ku, amimis da naka.
King misan a aldo , kaku migtapat ka,
é ku pa manwala keka basta-basta,
at ika munaman king kabola- bola,
king liguran daka , inya pang umpisa .
Aganaka ku pa , inyang ayskul ta na ,
king metung a sabdyek, mikaklasi kata,
potang pauli’na , ibat king iskwela,
bibitbitan mupa, ing karga kung dala.
É man pikakunuan, iti ustu kaya?
basta balu tamu , kabud na masaya,
detang panakit da , ding taung aliwa,
manong yapin yata, king anak kata pa.
Mismung kaluguran, sinumbung da kata,
at ding pengari ku, agad ing mimwa la,
inyang datang tana, kabud la malmura,
anya marine kung , linawe mu keka.
Balamu wari ku , mibagsak ya’ing banua,
makananu kase , mipakarine ka,
king milyaring ita , nang palto kung lupa,
para sabyan keka, é tana sundu pa.
Kagising kung abak, e naku mengan pa,
at mamalagwa kung , munta king iskwela,
para mikit kata, at sabyanan daka,
ing e muku yatad ,pasisibayu pa.
Maragul ku takut, kareng kakung matua,
kasi pin é dapat , sinabi ku keka,
ot ing keka rugu , ing pamilit mu pa,
é daka asisi, king lugud tapat ka.
King pilan pang bulan, pisasalikut ta,
ing pamipaglolo , pilit sindu taya,
maski ken mung sulat , pasikretu ta pa.
ban é ta mabistu , kareng sablang mata.
Ing kesyasan buntuk , oyta miniral na,
nung ustung matukal , bahala na sana,
ipaglaban mu ku , nanu man sa ita,
makanyan ku naman , panga mirikil na.
Uling sobra yata, ing lugud ku keka,
nanu man sabyan mu , usigan da naka,
kuntoru wa kung wa , semantalan mu na,
sukdul miniral na , ing e dapat sana.
King pamitula pa , miyagkatan kata,
menalbe ta’ng sine, ketang oras ayta,
king sobrang dalumdum, kilub sineng ita,
inya mipagkalub ing “Pers Kis” ku keka!
Sinulat neng Patria Bondoc David…
ning Capas, Tarlac
5 ning Setyembre 2015