Irvin Harvey Rivera
Siuala Ning Maliwalu/Anac Ning Baculud
October 24, 2019
Baryu Maliwalu, degulan kung Baryu
Tutu lang kasebyan ding kularyut, multu
Ma pa Matwa, Anak Dalaga’t Bayintawu
Pitatakutan da makanyan a kwentu.
Anak ku pang dimut tutung kasebyan na
Kwentung katakutan, misteryu’t majika
Neng takap ing silim ngara ring mangatwa
Kanyan la mamaglwal, kanyan masiri la.
Kareng siglawayan kung kwentu king babo
Ing kwentu nang Tibas yang ka’ku miyayo
Ngara pin ding matwa o yan nang dadalo
Ing kakaluguran, o yan makatando.
King almendras kanu karin ya magkanlung
E pu kalaraman, yan kwentu nang Ingkung
Neng takap ne ing dulum karin ne magsantung
Akit mung malagas ding tangke at bulung.
Kalalamang bengi e misan, maralas
Ing pamanampit nang mibantug a Tibas
Neng mangulatitik king atap ing balas,
Karin mu awaga, karin ka maliswas.
Neng misan mu naman nung magdilidili
Atin nang “mamaswit” lele ning Baliti
Kanyan mu aukul king punta’t sikoti
E pa la mayap ing lulwal ka neng bengi.
King musmus kung ukul neng mampit ing takut
Makuyad kung ulas karin mamaluktut
Pablasang Anak kung musmus pa at dimut
‘Gyang king pamakde ku e bisang patugut.
Ing kwentu nang Tibas mangga salukuyan
E ke agyung waglit agyang kapilanman
Agyang Talasawa na ku a kabilyan
Ing Bantug a Tibas e ke pin kalingwan.