Dake ke mu pu ining sinulat cung poesia a geua cung canta at kinua tonu king metung careng canta ning meangu bie a
Melapupuring Tatang Totoy Batu.
Facebook
Ing leguan nang tagle, ning Naturalesa
Ala yang caiarle, ala yang capara
Reng ngan sablang cule, at’yu la ngan caya
Careng bie magsale, mipagcalub cusa.
Ing cule maputi, simbulu ning linis
Pauaga na niti, masampat yang labis
Manibatan keti, ing dalise sunis
Ala yang cayanti, king yumu at lambis.
Ing cule ning aldo, mamapi yang papas
King bie pangaldoldo, e iti cucupas
Ing aslag na babo, king sulip miraras
Pagasa ing lulto, king daratang bucas.
Ing cule ning banua, misna king casampat
Iti darampul na, king malinong dagat
Anti lang milupa, a uaring pilapat
Ing leguan carela, migit pa king sapat.
Ing cule matuling, tanda ning tayimic
Anti ya mo uaring, benging alang imic
At ing tagulaling, ning pamisalpitic
Ning munag mangising, king salang magbalic.
Ing culul malutu, ya ing tanda ning bie
Keti buung yatu, careng taung mabie
Dayang magpatutu, layun sasagese
Aske na ning pusu, ya naman ing cule.
Ing cule aluntian, king capaligiran
Dacal a tanaman, mamie lang cabiayan
Deng bungang apangan, e la magigisan
Deti ampang no ngan, niting calicasan.
Deng mapilan cule, king cudta mesambit
King kecatamung bie, ilang macadayit
Atin la ngan dake, iti mayayakit
Careng sablang mabie, ablas king pasakit.
Inya naman sana, sucat ta’ng ganacan
Ing Naturalesa, yang pacalingapan
Pacasesen ta’ ya, at pacacamalan
Paulagan ta’ ya, at e sasalaulan.
Misanmetung ta’ sa’, cabang e pa tauli
Itamung magcusa, sabian king sarili
Ing Naturalesa, sesen ta’ ne ngeni
Bang e no magdusa, reng tutuking suli.
E. P. D.