(agpang kang bungsu)
Nanu kaya ing gawan ku kening kakung akaklasi,
ban e na sabian kasalan ko reng lalang na’t pagsisti,
uling pigaganakan ku patye mitas keyang bipi
pota kanaku da sangkan nung bigla nyang mayataki.
Ing sabla kung kapagnasan, kening kakung kaluguran,
Pagluwalu keng antimo king salitang kapampangan
Anya ngeni mimisip ku nanung masanting paralan
Ban e ya sumlam a lupa, potang bayu ke sabianan.
Maniwala yamo keya kareng usuk ku at payul
Nung aku ning kaklasi nang e man meyaring high school
Uwa tutu, mas biasa ya neng patilo yang burarul
Dapot sinulad nang gamit, makuyad ya’t dakal buknul.
Ing aisip kung paralan, ing kunwari mo mangutang
Antimo karetang asan a king agus sasalangsang
‘Ala lang keyaliwa ren’ kareng bayaning matapang
E la kabud mu mumusig karing parnas a mamulang.
Sana kaku malikid ya’t matba ketang giningkas ku
Nung sugu yang kalpinteru, pakit yang obrang pulidu
Uling ustung ing gewa na, daretsu ya keng patulu
Dakal lang mugnus papuring..bumanglu ing keyang lagyu.
E no sana pakyapusan anti retang mamulosa
A kabud lamu daralit, kambe na nitang musika
Angyang e ya makarima, kulang o sobra silaba
Bukud king mabsi la bulsa, e ya mate ing kultura.
Ika pamong tagimpan kung mituru kakung manayi
Ban king kakung pamagaral, e raku basta atawli
Uling buri kumu naman, mika-gradung matas dili
Saka daku parangalan, bilang sastring de kalibri.
Dapot akakit ko ngeni, reng orba mu e no ustu
Ding listun a paplansan mu, balamu reng sasalingku
Misan walis ding bitonis, makapildis la’t e saktu
Anya retang kekang suki, e ra buri ing de cuellu.
Sana itang minye bansag keka bilang mananabas
Kareng lalang mu o gawa, denan nalang sapat oras
At nung itang peka-padrun turu nepang miamas-amas
Pasada ning makina mu, e ne sumulung payatras.
(neng WakaOjie Mangalindan Pena)
* 29 marso 2023 *