Belangkas ng Apung Gusting
Riyadh, KSA 31/03/2015
I
Mag-adua nang pulung banwa anyang méko’t likwan daka
Pablásang king panákit ku, pamibiebie babáyat pa
Bistat man king ásmung sákit ing lalaut mantun pera
Alâ rugung ákarapat nune mamun ku’t mibata.
II
Pigmaklakan ku ing anggang sigûk mu at pámanángis
Saskup ya ing kakung salu uli na ning kekang aklis
Agwantan ku ing kakung luâng maybug-aybug mamalisbis
É ku nala átakbang man dening kayli’t wanang bitis.
III
Mípaugse ku kéni king kalibutna’ning Aláya
Nung núkarin ining balâs, ining ángin pámaspas na
Pibabatan ku ing ing kaplas at ing galas karing mata
King milalung páli’t dimla ing arung ku daraya pa.
IV
Ustung oras ning painawa kening silid migugúnam
Pásalamat ku king kalma king labuad a kakung disan
Miayo ing kakung túlâ at lumbe ning pilublúban
Potang datang at aisip ing lebasang kasakitan
V
Nung ali mû rening apû mung painturû’t magaral pa
Mataluktuk la pangarap, masilad ing kabyasnan da
E naku sa’ mísip mako kalúpa ning kakung kóya
At mangári kang áting kung mángakúbang ípusan da.
VI
Tunggen mo pa reting babî at ding dápu king karinan
Mengári lang sántu’t túpang sákri’t sakdal king káyapan
Ala noman pakundangan king bílî ring sasakúpan
Lalto lamu ustung oras ning botuanan o alalan!
VII
Makananu lang dumatun, e na mako rening tata
Nung makanyan ing sistemang durut-durut pa kanita
Ing sueldu ra’t penakitan e ya sapat o kulang pa
Pangarap da karing anak, paninap nyamung tagana?
VIII
E ku pa man mekaulî, kéka indû kung baláyan
Pamagbálik nápin agad íng kanákung babalakan
Kaba’ kasing mimíral pa’ing pamanáko karing kaban
Ali ku pâ magdatun king kárinan mung kakung duyan.