( kareng manibala ning A B E D A K A )
‘Na kung kapanatu, ampon kapagsisti
Kareng kayaguman nasa kung kalimpi
At king panakit ku, ilang maging susi
Ban ing sabing mana, e ya malumpawi.
Oneng migit la pa selan at katapang
Lamu retang papil de liyang magaspang
E la man paindispu, e la man mangutang
Kareng kayaguman, lilisya panakbang.
E mu pala ita ing keyang intensyun
Ing keyang tagimpan dinan deng pusisyun
A ban milapit ya at mika-proteksyun
Kareng kayantabe ning kekeng peka-pun.
Misan memaskil yang metung a kataya
Ala man minapa, ala man kinontra
Bukud yang komentu a payul mu keya
“Nung suntanadu ya, e nane kakanta”.
Manibat kanita, ing imbut kung pale
King terak ning angin, lamu ing melumbe
Ding panaligan kung bungang gintu-kule
Piglipat no pala, king sumangid bale.
Paninasan namu ning aguman ayni
Ing amanung sisuan, e ya maduwagi
At e sa’ kalingwan deting bayung suli
Ing salitang likwan ning budning bayani.
Makanyan man abe, e ka sa’ paysubuk
Karetang maglakung asan a maumuk
At nung pesaklo ka’t ‘nangu pati duluk
Maglual king asbuk mu, babau nong baguk.
Nya pakisuyu mu karetang makiabe
E mi la tulutan, retang marok lawe
Lakwas nung e neman kapampangan tune
ilutan mi lamu, retang atin pile.
(neng WakaOjie Mangalindan Pena)
* Agosto 25, 2022 *