Metung pa pung daque ning librung Pasyun ding Talapagobra a sinulat nang Lino G. Dizon anyang banuang 1930
“Macabaldugan yang e palac ing Damulag qñg Capitalistang mabibie qñg e na pipauasan”
Caring anggang mengayapsi
Queting yatu macabili
Ing tau matas ya uri,
Mayupayang dili bili
Caya ala nang milimpi.
Dapot ing uri ning tau
Queti babo na ning yatu
Mig adua ya bandang sepu,
Uri yang migmasicampu
At uri yang mecalulu.
Ing uri ning casicampuan
Atyu caring mayacayan
At matulang manalipan,
Ing uri ning cacaluluan
Atyu caring meyalipan.
Nung surian mu iting bili
Adua mu alang miuacsi
Calulu at masalapi,
Macanyan ya mung mepisi
Ing tau qñg cayang uri.
Dapot ninu man quecayu
Taung mapagmasicampu
Tanggapan yu ngan canacu,
Iting pemanugalyan yu
E asal anti mong tau.
Ing Damulag mayap ya pa
Qñg taung alang consensia
Mesabing ating caladua,
Canacung ipaquilala
Ing catutuan a talaga.
Taung mapagsamantala
Qñg pauas na ning aliua
Aggiang bisa ca’t e bisa,
Tititian me ing maluca
Queting sarili nang taba.
Ala cang balung paglocuan
Parating pipiraitnan
Nun’e ing queca papacan,
At papalto qñg pibandian
Ngeni quecang pagmayabang.
Inya iting quecang dapat
Taung matuling a angad
Nung surian mu sa’ng banayad,
Mayap ya pa ing damulag
Queting asal mung e mayap.
Pagumasdan meng banayad
Iting calulung damulag
Ing obra na mangabayat,
Bagya ya rugu magtamad
Agad yang maglate balat.
Aggiang mebangcac neng cau
Paniarul ning ortelanu
Matula ya pang mamintu,
E ne man manayang sueldu
Labis na ing bulung atbu.
Pamaniarul mayari na
E ya mu rin mipainaua
Ing damulag qñg sipag na,
Isabac de qñg cariada
Yang guguliut qñg gareta.
Ing damulag nung macanian
Ing suyu na tutung dacal
Tutu yang macabaldugan,
Dapot aliua ya pa yan
Ing caya mu paquinabang.
Ing damulag bandang sepu
Nung matua neng pagobra mu
Qñg suyu nang e mu nanu,
Tacman ne pa ing pulqueru
Nabangnan re pa reng tau.
Macanian ya cabaldugan
Iting calulung animal
Ing suyu na tutung dacal,
Mesabing animal ya yan
Dapot tutu yang marangal.
Dapot icang masicampu
Caring calupa mung tau
Nanu ing cabaldugan mu..?
Mabibie na cang pabatu
Ica pang lalto berdugu.
Ala cang balung daraptan
Nun’e titipun pibandian
At cabud mu manalipan,
Buri mu pa ing marangal
At parating pupugayan.
Icang macanian a tau
Ing bage atin cang sagu
Ba’cang maglupang demoniu,
Bage na ning daraptan mu
Queti babo na ning yatu.
Potang umisan cu naman
Iting quecang cayasalan
Acung alang cabaldugan,
Nung maqui-pusu cang banal
Ica ing sucat manuman.
E mu paibabo ing bandi
Ibat qñg pamamintai
Migit qñg quecang sarili,
Uling nung e ca sumisi
Calulu ca bandang tauli.
Uling cabud mibabo ya
Qñg lupa mu iting cualta
Asajan mu sumisi ca,
Bandi canan dang pulilia
Pati ica laclacan da.
Inya icong capatad cu
Ca-uring pacacalulu
Surian yu ing sinabi cu,
E la sucat pugayan yu
Deting mapagmasicampu.
Queting canacung inulat
Nung surian yu mung banayad
Malagua tamung mimulat,
Panualan yung ing damulag
Mayap ya qñg taung linsad.
Inya icong mayacayan
Matulang manampalasan
E mayap a cayasalan,
Atin panaun a datang
Sumisi cong casalanan.
<<<<<<>>>>>>