Neng: John Bendido
Mengari mo keng sampaga, e macasawang lalawan,
Malagu ing cayang cule, mangindat king panimanman,
Ing banglu nang sisingalngal, dacal la reng mangundiman,
Susulapo cambubulag, buri dengan pidugpanan.
Mengari mo keng dalaga, ing leguan na mitmung timyas,
Deng kile nang mala tari, malagu la panga ticuas,
Anya retang baitau, keng arap na labas labas,
Anti lamong tatso teksas, atno mo keng pangatikas.
Mengari mo ketang canta, malamyus ing balang tunug,
Ketang cumpas na ning nota, sasaktu la keng balugbug,
Detang mayumung lirika, keng salu la kubug kubug,
Manaun lang daramdaman, keng panaun e la lumbug.
Mengari mo ketang bale, masanting ya panga gulis,
Telacad ne ning alwagi, careng sucad alang mintis,
Deng asyas nang mangatibe, gang ditac mu alang pildis,
Saktu la ngan pangalapat, ketang gulis na ning lapis.
Mengari mo keng poyeta, miputungan gintung laurel,
Deng agus ning kayang rima, masanting la panga lebel,
Mapinu lang mitmung sampat, matibe lang anting barbel,
Malalam la kabaldugan, susulapong mala anghel.
Macanyan ya king catimyas, ining amanu tang sisuan,
Mala batwin yang kikislap, ketang ulap ning katasan,
Keng labi na nitang banua, babatso yang timan timan,
Amanu cung gagambulan, lubus dacang pacamalan.
Mibalangcas ya ing poesia.
April 3, 2023 – Lunis
Oras: 10:09 PM