(huebis santo)
binersu neng ORLY MANALO DIZON;
Orthograpiyang: C-K;
Sucad: ualu ualu;
Talatag: Lima balang estropa;
Estropa: anam
1
Kinua’t tiki re i Jesus / at pepusan de ing crus Na
King barug da mengatdas Ya / gulut, lupa’t mengatomba,
Tsaca De dela king metung / lugal ausan dang Golgotha
Carin De pinacu king crus / dening adua abe na la,
Ila ring presung tulisan / binusal De libutad da.
2
At canita i Pilato / ginaua ya’ting rotulo
King ban ya’ting abitasa / anti ya uaring anunsio,
Iti keang pepabili / ketang crus nang JesusCristo
INRI(Ieus Nazarenus Rex Iudeorum) yang ing ababasa / a sinulat nang Pilato,
“Ya Ing Ari Ra Ding Jud’yos” / salitang Latin at Griego.
“PIRAKE DA ING MALAN NA”
3.
Iniang deta nang sundalus / caibat Deng pinacu king crus
Pengisi De’ti imalan / penabit da deting lubus,
At tsaca da pa pirake / retang apat a sundalus
Dapot itang Keang gani / peningalmang ban atalus,
Nung caninu ya’ti mibie / mipuc ing sabi nang Jesus.
“I JESUS AMPO I IMA NA”
4.
Atiu la king lele ning crus / deti Kea macasadiâ
King parusa Kea binie / at macalunus Nang calmâ,
Ila rening Keang Ima / ampo’tang metung pang indâ
“Babae ‘yan ing anac mu” / ngana kening Keang Imâ,
“Oyan ing Ima mu” ngana / ‘la ding pamun Nang salitâ.
“ING PANGAMATE NANG JESUS”
5.
Agiang pa naman canita / Jesus iti balu na ngan
Itang Kea macayatang / ampo nitang cararasan,
Itang anggang macasulat / deti Keang tatanggapan
Inia ing Keang sarili / dadaun ne’ting lubusan,
Acuan na ngan itang caplas / angga na king camatayan.
6
“Mau Cu” itang gagcas Na / at mitagun atin pala
A alac misna king caslam / at pesimsim de’ti Kea,
E apiuari nanu ya / ing lasa na macasuca
Canita na’ti sinabi / ngana rugu “Metupad Na”
Agnan dicu Ne’ng buntuc Na / miyangganan Ne inaua.
DIZLAG FARM & RESORT, April 6, 2023.