belangcas neng Orly Manalo Dizon;
Orthograpiang: C-K(ca,ke,ki,co,cu);
Sucad: ualu ualu;
Talatag: apat balang estropa;
Estropa: ualu Aug, 10, 2017
1
Iya itang pecatanda / a papalto ning Miglalang
At yayampang ne’ti caring / sablang mabie Keang lelang,
Itang pangabalantuc nang / ugis arcu king singtingan
Macaguna yang lalauen / ketang busilac nang leguan.
2
Iya itang Pinan-ari / ing leguan na macasilad
Ala iting acayambing / lampus king tagle nang tilad,
King miayaliuang nang cule / at king gabun macasayad
Cauangis ya uaring pana / igutan na niting labuad.
3
Pinan-ari iyang tanda / ning megauang Casunduanan
Na ning Ginu at ding mabie / abasa king Matuang Tipan,
E palbug pang pasibayu / ing leuacan ning sicluban
At iti Yang Keang tetag / carin anggang sasacupan.
(Genesis 9: 8-17)
4
Tutung pagmulalan ya ing / pangatacmus niting ustu
Ugis ya uaring curona / mayayakit keti yatu,
Nung bulayan ya’t sipatan / iya itang maging tronu
A macapanaya caring / magmasabal king Amanu.
5
Sacdal la uri king linang / ding macauili nang cule
Ampo itang matindag nang / macayaliua nang aske,
A pesilad nitang aslag / na ning aldo ketang laue
Tsaca dimla na ning ambun / mananabung malumeme.
6
E basta na balang oras / akit me at abatsauan
Mamili ya naman tiempo / mirikil ing caorasan,
Potang maglulam ya’ng banua / atin calangcap a uran
Carin ya iti sumilip / ban pasiag ing Casunduanan.
7
E la binang micanlaut / uling sangcap no ning yatu
Ding cule ning Pinan-ari / at macule bie ning tau,
Mipapareu lang pane / lunto-maco pasibayu
Keti labuad ding mabibie / a lelang ning mal tang Ginu.
8
Lalto’t, mamako ya iti / cabud ala nia sagulî
Alus e me amalayan / ing paglaco nang piraglî,
Ing lacuan na e sucal lub / nune tula’t misnang sarî
Ya’ng tanda ning Casunduanan / ING MALAGUNG PINAN-ARÎ.
DIZLAG FARM & RESORT, April 8, 2023