nanung kekang leguan? sampaga ka wari?
makule ka waring anting pinanari?
at nung sampaga ka, nanu kekang uri?
ot ditak la yatang keka makiburi?
at nung ditak lamung makiburi keka,
malagu ka kaya nung mang dalaga ka?
o, nung baintau ka, matikdi ka kaya?
o nung ‘tin kang anak, mangaliap la pota?
o nung tigtigan ka, o kanta, o nanu,
ot ditak lang keka maburi keng tonu?
ot deng balugbug da mas kapad do tiempu
deng kanta at sunis a e kakatamu?
mengari ka wari keng metung bubungan
a mismung anak mu, e ra tutuknangan,
isipan da kasing iyang kekang leguan
e ra apangaya’t apagmaragul mu man?
alang kalaraman dakal ka man anak,
deng matula keka, ditak la mung ditak,
misan deng sasabi a mal da kang tiktak,
detang e ra inda mas kapad dong palak.
misan keng palage karin ka mu bida
uling papakit dang gagamitan daka,
dapot neng al’wa nong taung karungut da,
lele daka sagli pota katelu ka.
melungkut ka mekad keng kakung sinabi,
isipan mu mekad anak kung salbayi,
tinabug ka mekad keng bunsu mung ini,
sisisian mu mekad ing kekang sarili.
aminan ku keka makalungkut ita,
pero dakal kaming magmasabal keka,
nung kareng aliwa simpling amanu ka,
kareng kekeng pusu, keka alang muna.
e raka mu gamit kareng kawatasan,
nune angga kareng sulat kapalsintan,
kareng talamitam, ikang kasangkapan,
at kareng pusu mi tutung pakamalan.
uling amanu kang alang migit uri
keng uyat mi ika ing dayang kukuri,
ibat ka king Babo’t keya ka pamuri
inia pin e raka bustan malumpawi.
05/03/23 //18:27
kaibat mengan biruyang sagin