binersu neng ORLY MANALO DIZON;
Orthograpiang: C-K;
Sucad: ualu ualu;
Talatag: anam balang estropa;
Estropa: atlu
1
Uling aldo da ding Jud’yos / ipagselebran ing Fiesta
Ding’gang bangke e la dapat / manatili ketang crus da,
Antimurin itang Sabbath / a pagmasusian aldo ra
Cang Pilato inauad ing / ding puad reti balbalan la,
Minayun ya i Pilato / ding sundalus keang lirga
King ban napin detang bangke / ilaco la ketang crus da.
2
Matula da lang pemalbal / ding puad da detang tulisan
E do deti petugutan / angga mipusit la laman,
Iniang ca Jesus la miras / mete ra neng rugung disan
Dapot Longinong sundalus / tindus nia rin bandang tagian,
Ketang matilus nang sundang / sactung catalindikingan
Canita na sinulpit ing / daya’t danum king catauan.
3
Caibat na nita i Jose / metung alagad nang Cristo
Iti micalacas yang lub / ing aduan na cang Pilato,
Ing bangke nang Ginung Jesus / king ban idayu at laco
At sactung king oras ayta / dintang ya i Nicodemo,
Pisaup deting bidbaran / ing bangke king telang lienzo
Tsaca da Ne iti kitcut / sactung cafiestan ding Jud’yo.