(abedaka)Atin ke pung dalig metung yang aguman,
Istriktu ya kanu keng salitang Sisuan
Nake kapanatu kareng tegalugan
Lakwas nung lili yang salitang dayuan.
Anya kareng bayung maybug pang mamaskil
Mamikelangan la’t tatakut mabungil
Uling ike kanu asna keng kasangil
Lakwas na karetang mainge pa keng tukil
Dakal kareng miembru, patye meyatu la
Ing pane dang sangkan, mipakarine la
Dapot ing katutuan, bisa lang magtinda
Asan lalaku ra, malanam la lasa.
Agad lang sisibi, tambing lang tatabug
Ing pagmaragul da, dalakit lang ilug
Saka la magpalbug, lagpas anggang intud
Ban karin da bugnus, itang sakit dang lub.
Kapagnasan namu ning kekaming grupu
Pagmasabal mi la reng sabing amanu
E nake man tantung biasa o larinu
Nun’e ing idake nung nanu ing ustu.
E ya anti ini karetang aliwa
Ing dakal la miembru yang karelang nasa
Ala lang pakialam king Amanung mana
Basta mamie ka sa’ng parapat keng misa.
Atin naman grupung e bisang paytawli
Patye ing mipaskil, ibat ya king pari
Angyang e malutu, ing malan maputi
E nala payulip, reng ume nang gisi.
Anya kareng ipis, buri ko reng Alas
Angyang nanung laban, atin kang pangangas
Antimo karening subuk na at masias
King Amanung Sisuan, lara lang maparas.
(neng WakaOjie Mangalindan Pena)
*17 ABRIL 2023 *