Pacapaulagan da ca,
ketang pamagpaulagang matapat at maralise,
layun cung paramdam keca,
ing tune pamagmasabal at uagas a pamanyese,
e ca sa migaganaca,
yacung maging carame mu king cabilian mung mipapase,
manalacaran cung ica,
a icang sucat luguran at lingapan masalese.
Balu cung dacal pasakit,
ing daranasan mu ngeni king cabilian mung magdusa,
keni cu lacuas ipakit,
at patunayan cu keca nung nanung tune cung nasa,
at ing pamagmalasakit,
ya ing idaun cu keca bang mirinan cang pagasa,
anggang e ta acacamit,
ing matagumpeng labanan careng keca mamiragsa.
Ding kecang aliuang suli,
ume cu lang amuyutan a icang sucat lingapan,
uling dacal nong melili,
king daclat ning catimauan a layun mung panagimpan,
nung mitubud cu’t mepili,
asabi cung mipala cung maging metung mung alipan
uling mismu cung sarili,
balu na ing laman na ning canacung pusu’t isipan.
Pablasang king cacung daya,
ica mu ing sasagese careng uyat cung mabibie,
agyu cu ing magparaya,
anggang atin cung inaua, anggang keti yatu mabie,
e cu sucat magpabaya,
at gauan cu ing marapat a keca agyu cung ibie,
anggang ing Dios Mayupaya,
ya ing cacung cayantabe king peparam na cacung bie.
E. P. D.
Feb. 12, 2023