16 a silaba, 4 a linya, 8 estropa
nang Apung Gusting
06/10/19 Riyadh
I
Kukú-kúkung mánimutlâ king asúk a mákagunâ
Âgwantá’nang é mibugjâ ban yang agad mitas “tama”.
Súsulápo ya íng diwâ, limpad-limpad karing bígâ,
Penandit mû asmé siglâ sásagakgak ya king túlâ.
II
Lalákad yang anting “robut”, ing buntuk na mangilábut
King ilduk nang pasapulyut, deng intud na méngalambut.
Ing díla nang mibaluktut mamapsé neng putut-putut,
Bagya námû mibakutkut, kening bisyu mikukutkut.
III
Tabletas a kayang liklak é tatalab itang alak
Kabukas neng terak-térak é pápagal indak-indak.
Lipang ne at tilak-tílak at ding mata na mengaslak,
É na ikwá mang métulsak kabud nya mû mípatalpak.
IV
Âtlung aldong alang paklud é mamangan é mátudtud.
Ing utak na mayayabud é pa mitan a kúkudkud
King asuk a anyud-anyud at gagápang king alulud,
mányaliksik ya ing águd king inauang mapapaklud.
V
Mángalgal ya kalamnan at matatdâ ya panimanman
Málipup ya daramdama’t mangarimla talampákan
Kailanga’na nang mikargan at uyat na saksakanan
Ban kayingking ning katawan, mipasno na at mipaldan.
VI
Ketang suluk misalampak, pigáglón deng makatalpak
Pengusut de’t pemanggirak at saka re pa pinyaksak
King mala’nang gabak-gabak, ábitasa meng pinyamuak
Detang kaya mindakurak kargadu lang droga’t alak!
VII
Kalatkálat la keng dalan kabang atin sisingutan,
Akit mu lang mitágálan potang atin apagmasdan;
Samsaman dé at abitan itang kwintas o tingga man,
Makananu lang sagipan ding kalulung kayanakan.
VIII
Pilan la pang mangasaldak at king áun mangaramak,
manganabû’t misalalak, karing tandus mangayakdak?
Pilan la pang líling ának a ing bié ra mangalabsak,
keng gasgas a é da sanak é mimisip bayu dalpak?