Cawatasan Capampangan : Alipatpat
Capampangan :
Ding Watas Capampangan E lamu Larinu Queng Pamanyulat Cawatasan Queng Amanung Capampangan / Sisuan , Nune , Mabeluan La Naman Queng Pamanyulat Cawatasan Queng Amanung Inglis . . .
Cawatasan Capampangan :
Alipatpat
nang Jose Roman Reyes Laquian
Qng malalam dalumdum na / ning metung caleldong bengi , /
Calibudtan dutung ilang / manuyung anting sulugui , /
Anti lang minunang batuin / saslag salang macawili ! /
Quiquinang at saslag papas / batuin susulapo pilmi , /
Detang malatictic papas / ning tulang alang cayanti /
Babo sampaga’t dutung lang / masayang panaquit bali ! /
Quetang metung mapalsintang / cabengian na ning caleldo , /
Babo da ring dutung ilang / undap-undap a sulapo , /
Malatictic cahun-dutung / ning guintung bayang gagalo ! /
Masiglang teterac langan / mitipun masala babo /
Da ring sanga ampon bulung / malatictic quilim la mo , /
Mangalating sulu mamag / undap-undap sayang lalto ! /
Dening mangalating papas / quinang miladlad masala /
Libutad sampaga , sangang – / dutung mimindac masaya , /
Pepepen ding balang anac / lumual at mamialung bina /
At matulang labis-labis / qng gayac dang asmu sala , /
At qng quinang na ning lugud , / balang anac magsalita , /
” Alipatpat susulapo / qng pusu cu . . . mandatila ! “
Cabaldugan Amanu ( Word Meaning ) :
mandatila = maman-diwa o mamandatun diwa ( CAPAMPANGAN )