( Poema )
nang Jose Roman Reyes Laquian
neng cai maibug cang cumiac at gumaga
caring saquit ning bie queca mamaluca
mau cang lingap at lugud a daquila
cambe ding lua’t tacut a misasagana
neng cai datang ya ing metung a tau
queng bie mu’t tagquilan ne’ing mismung pusu mu
caibat calad-dua mu sulsia’neng masolu
at di’an calayan ne’ing quecang espiritu
neng cai damdaman me’ing metung a bocis
mayumung cundiman a alang cawangis
caring casaquitan siuala yang mamalis
queng saquit na ning bie ban e ca tatangis
neng cai malambis ausa’naca laguiu
anting magdalit a sampagang masamiu
at qng queang caul tapat a maniuyu
uari cang sampaga qng angin magyuyu
neng cai atiu ya maquiramdam queca
munie lugal nung nu macapainaua ca
nung nu lual naca qng api ning problema
sugat queng pusu mu malaleng ulua’na
neng cai datang ing oras a aquit me
nung ninu ing quecang caluguran tune
ya ing cabud munie maulagang bague
alang al’iuang munie pagasa mu queng bie
neng cai ing dangal cambe ning catutuan
cacablas ya queng bie mitmu cabaldugan
bini yang tutubu libutad caquewan
qng macayama nang macaslag a leguan
neng cai pa’intunan me’ing bie qng masala
at eganaganang saya na at tula
at ding balang aldong dala nang saguiwa
cacanta na la ning masaya mung diua
neng cai , nucarin man mo , qng quealan ,
atin datang queng bie mu munie casigla’n . . .
macuyad ya ing bie ynya paulaga’n
queng bie munie lugud . . . lisun mung tuntunan
ahhh . . . neng cai