Neng Al Pedroche
(2:24 ning abac)
Nanu yng nabangnan
anggiang acua mo ngan
Reng guintu’t, briliante
ning metusicluban?
Ica man ing peca
masalaping tau,
Nun ala cang lugud,
Nanu’yng asopas mu?
Ati la man queca
reng yaman ning yatu,
Ala lang ulaga
nun lisia yng bie mu.
Reng cualta’t pibandian
Quildap la qng biga,
Masalang gugulis,
Tambing no’ng nawala.
Pero nun atin cang
Tutung calugaran,
Reta reng taganang,
Tune cayamanan.
Queting cacung pusu
Ating cung ducanan,
Carin la maratun,
Ren nga’ng caluguran.
Yla reng guintu cu,
Brilianteng quiquinang,
A pacamalan cu
Anggang camatayan!