nang Jose Roman Reyes Laquian
Nung queng Capampangan ing dayang cacawal
Daya yang Dalise Lugud at Pacamal
At anti yang sibul lalapo pamaglual
E ya malumpawi ing amanu nang mal !
Nu man labuad ya miparas queti yatu
Ing catutuan na ning queang pangatau
Ya’yting sasalita nang Sisuan Amanu ,
Maguing queang bersu sacdal ya quing yumu !
Ding pipumpunan na — yaman deng pamana ,
Tumaila nang Indu inya pang umpisa ,
Maleguan Amanu ning tula na’t sinta
Ya’ing Daya ning queang Dalit at Poesia !
Ala nang amanung maiguit pa quing leguan ,
Amanu ning Diua’t Cablas ning Cabiasnan ,
Larauan Matindag quing Nuan nang Cabilian ,
Ala nang maiguit pa quing Amanung Sisuan !
Ninung Capampangan nung ala ya’ing amanu ?
Nung alang tumailang dinalit nang Indu ?
Nung alang pimanan yang Sisuan Amanu
Nanu ya’ing silbi ning queang pangatau ? . . .
Daya na’t Daya ding Bayaning Matapang
Ya rin Daya ding Poetang Matenacan
At ing cacawal dang Dayang Capampangan
Ya ing Bie at Diua ning Amanung Sisuan !
Titibuc yang Dalit quing nuan nang bili ,
Ya’ing pangisnawa ning Lugud a Mapali ,
Ya ing Bie ning Laji ta’ng Matas a Uri ,
Ya’ing Amanung Sisuan — Pusu niting Laji !
Ing Dangal ning quecata’ng Pangayatyu’t Bie
Ya’ing Amanung Mana , ing Amanung Tune ;
LAJING CAPAMPANGAN , E ME PICARINE
ING AMANUNG SISUAN , IPAGMARAGUL ME !