piskil pasibayu para kareng bayung mamasa:
“malaram ya i ‘ma ku”
ing e ku aintindian ot bawal maglaram
samantalang i ‘ma daraptan na naman?
pota kareng matua alang bawal bawal
-pero reng malati dapat lang pamar’gan.
magumpisa kan’tang ‘la ne i tatang ku,
atin aldo muring i ‘ma ku alayu;
daratang ya bengi o kaya ‘bat me’gtu,
kauli, ing tal’nan mumuna, kalderu.
babo ning lamesa parati ming ulam,
nung nanu neng bengi, neng abak, ‘ya naman;
toyu ampong taba… -taba mu neng misan,
-sabo ibat bomba’t king asin biburan.
neng misan ‘tin sagin ‘bat king siping bale,
neng misan ing duruang, sabo ampong gule;
neng atin nang maus, i ‘ma tumiman ne,
mangabaldugan mung ding siping dinan de.
king tulid pisamban menakit kung anak,
maranup ne yata, e patugut kikiak,
ima nang kayabe, kikiak yang papalad
karing balang taung arap na lalabas.
aganaka ku pin ‘niang e ku pa mengan,
‘la yu pa i ‘ma kung meglabada naman,
anakung kalukluk king kekeng lakbangan,
bala mu sisi kung manayang kurukan.
i ‘ma, iniang misan mangan na ke sana,
akung pekanan na, ngana mabsi ya pa;
alben-alben na ku at timan timan ya,
tatamual ku kasi uling maranup na.
pemilit keng igkat, e maranup kanu,
ngana aku namu ing mangan dili ku,
at kaibat kung mengan peglantang na naku,
love na love ne kanu ing keyang baintau.
ugali na nakung parating pagkanta,
ban agad datangan ning tundu ngana pa;
bala mu bingut ku a patudturan na,
bala mu bingut ku a magberat keya.
bengi, milingat ku, at ikit ke i ‘ma
magnapnap yang bangi king kekeng kusina,
at sinalikut ku, e pepakit serya
uling king ikit ku kabud naku miglua.
malaram ya i ‘ma, e maranup kanu
nandin e ya bisang mangan kayabe ku,
ala palang keya, binie na ngan kaku,
sana binawal Ne nitang Apung Guinu.