(6:53 Ning abac, queni qng tugatug ning Vivere Hotel, Alabang)
Casuelu cu lang lalauan
Manayun qng panimanman
Mangatas a edipisiu
A telacad na ning tau.
Dapot matas ya man beluan
Yng tau queni sicluban,
E na sucat pamingaya
Yng sabla nang agagawa.
Nun e ne lelang ning Ibpa
Nanu mo’yng queyang agawa?
Nun alang Dios-sibabala,
Atiu ta mo? Ala, ala!
Bague tamung pasalamat
Queng Dios tamu a dinapat
Nune careng queyang gamat
Ala tamu queti labuad.