dakal ku akakit, masala ku mata,
lakuas kareng taung dimut keng itsura:
ring bisaklat arung, ring lupang susoga,
ring noni’t guibanang mitubuanan lupa.
inia galang kaku, tinabug ing sala?
dininan Nang belu Nitang Mayupaya?
nganu keng sarili, “rugo, ini na’ta
ing sepu kung daklat king pamamikudta?
kanaku, ing sala, ot danun merulom?
king pisak a dulum, nanu’t makakulong?
ot wari sinilim? e wari karanon?
ding mata ku wari mirin lang talikbong?
pota naman galang, ini barug ning Dios
uling king laggiu Na melagad ku awos?
***(meulip)misulat ya ini ketang manga banuang 2011, panaun a kepaliarian ya ing bansang Japon. ini ing panaun a isipan ku e naku manakit pasibayu, inia pekisabian ke ing abe ku a istung melaus kung mebulag isubli na ku kang ima ku at iya magdalaga yang pasibayu. ini ing panaun a manintun kung kakaluguran. uling bala mu ala kung kakaluguran. at deng agad ikit ila reng pisan/kapatad ku ampo reng pamiliang bibilug keng cks-hau ampong metung a e bisang pakilala laggiu pero dimdam kung atiu ya keng malapit, kayi penamdaman ke munaman i PL Art Dax keng lele ku. keng palang makanian a bili, aggiang mangailangan kang pinansial, pero itang damdaman mu mu man a atin kang kasabi, maragul nang bage, kasi apapasikan da ka lub. ngeni pu, siguru manga 75% ya mibalik kasala panimanman ing wanan kung mata at 80% neman ing kaili, e la sientu por sientu mibalik kasala, pero maragul kung maragul pasalamat keng Babo at kareng gamat a ginamit Na ban saupan Na ku.