Neng Al Pedroche
(8:00 Ning abac, Vivere Hotel)
Nucarin ca, o Dios
Qng babo o sulip?
Careng balang suluc
Peca-silip-silip.
Qng peca-malaut,
Qng peca-malapit
Selicsic cu la ngan
Pero e que iquit.
Dacal cu pintalan
Qng pamanalicsic,
E que man atupan,
O baquit, o baquit?
Maibug cung sumucu
Qng pamamanintun,
‘Ting linapit cacu’ng
Taung maung danum.
Melunus cu queya,
Dela que qng sibul
At carin mipasno
Yng cau nang danum.
Caibat atin namang
Canacu dinulug,
Tau yang maranup
Maniawad yang saup.
Dela que qng ardin
a mitmung tanaman,
Nung nucarin dacal
Gule a pamangan.
At caibat na nita
Iquit que yng Guinu
Qng lugud at lunus
A penamdaman cu!
Caluat cung menintun
Careng sablang lugal,
Yng pacamalang Dios
O’t e que atupan?
‘Niya pala,’niya pala,
Yng Dios maratun ya
Qng pusung qng lugud
Yng mamapo queta.