nung pansinan ta ya pu ing amanu tamu, dakal ya amanung makatayid keng lub (pilubluban o pusu) kalupa ra ring panatag lub, e mamin lub, mayan lub, palage lub, marok lub, sira(n) lub, mina lub, makwa lub, tumabang lub, kumawang lub, alub, tibe lub, at aliwa pa.
pirayit-dayit ku la pu para keng pamanigaral at pamagaral.
“panatag kata lub”
panatag ing lub ku king lugud ku keka,
e ka e mamin lub nanu man sabian da,
sumangid ning kaku ‘na kayan ing lub da
at palage la lub kaku reng dalaga.
dakal man marok lub keng lugud tang addua,
siran da ka man lub, ing lub mu e mina,
keng lugud ku keka atin kang tiwala,
nanu man gawan da, ing lub mu e makua.
alub da na kasi, ing lub ta tumabang
king metung at metung, ing lub ta kumawang
ban makasingit la at ilang numabang
(‘nia tibayan ta’yng lub king sintang e sintang).
dakal pa pagsubuk takman ining lugud,
kapanatagan lub ing tibe ta buklud.
(inulip)
05/03/20 /13:07
kabang maglutu