(Published and Copyrighted ©2018
Irvin Harvey Rivera
Siuala Ning Maliwalu/Anac Ning Baculud
September 18, 2018
King kalati ku pa, labitlabit na ku,
Ngara mo wari ring makaramdam ka’ku
Mengari ku kanung kulasisi’t loru
Nung magsalita ku, daig ke pa’y ‘Ma ku.
Nanu mo kaya ing pengayas dang dila
O’bat nakung ‘tulid king pamagsalita?
E ra yata balu king kalati ku pa,
Paksabyan da na kung matulid salita.
Ining ka’kung Igpa a magsasa-Watas
Kapampangan ya ing buri nang pagingkas
Bang datang kanu ing panaun at oras
E ya malumpawi ing siswan nang gatas. (Amanu)
Inya naman ngeni, metung a dengalan
Ding ka’kung Pengari Tal lang Kapampangan
E ra mo asabing Anak ku ping daywan,
Uling gigingkas ku—Ing Amanung Menan.
At karetang sablang kalupa kung Anak
A lalabitlabit kabuklat ning abak
Magaral tamu at dungdung ta’ng mataktak
King pamagaral king amanu ring tanak.
Karetang pengari karing sibabale,
Ing Kapampangan sa’, e ye pikarine
Turu la ring anak, magsilbi kong gabe
Ing Amanung Siswan, e ye pakilibe.