Ining kákung balen Capas , nung nú anti ing legua’ná,
anti ké móng pakipará , king banglu na ning sampagá,
sampagá yang mamukadkád , ketang jardin ding masetá,
mamaldo man…mamanurán , ing talulut titingkad yá.
Pilan bésis migawarán , king linis át kaayusán,
úli daréng mémale’ná, mágmasabal king tungkulán,
adwang gámat déng tinikdó , king masampát á paralán,
inyá é ya méging sangkan , éstadu ning kakaluluán.
King napun man ó sikadduâ , dakal manyad pakalulú,
dintang noman deng Mercanu , menalakad nalang kampu,
ding memalen Capaseñu , dakal karen meimpleyu,
at binang menga absueltu , king pamibie bie a kalulu.
Máragulan a pagsubuk , kéya nalang alagpasán,
úli rening manungkulán , king nasâ rang katimauán,
atin la pin pisanmetung , at gewâ rang batárisán,
mabayat man ing probléma , inagyu rang apisópan.
Ding adwang pulung Barangay , a sasakupa’nang lualás,
é ya meging sumbagal ing , kasákita’nang aránás,
antí yamó king agila , migising né at mimasmás,
inya rening kéyang pakpak , miladlad nó’t papagaspás.
Ngeni murin mayayakit , misna ne king pangasalâ,
king panyatang naning grasya , alang ninung makasagkâ,
úli napin pigkalub ya’t , ukul nening Mayupayâ,
inya “Salamat pu Guinu”…king balen kung misaplalâ !
Ing kekong talasuyû ;
Patria Bondoc David
(Tsokolating Lagu-lagu)
ning Manlapig Capas Tarlac
Nov.17, 2017
