(PUGE PARA KING PANGANE KUNG ANAK)
Irvin Harvey E. Rivera
Siuala Ning Maliwalu/Anac Ning Baculud
April 20, 2019

Ining pangane ku kapuripuri ya
Miyaliwang parangal ing auuli na
Nanu mang ligligan ya ing manimuna
Tantu nang kabisyanan tune ping mayaga.

Mumuna pang baltang kabud ikit ku ne
Ing tagle nang belwan ala yang kapante
‘Nya, n’yang mayari ya, ing pelakpakan ke
Ding keyang medalya e ku no asable.

Pangaras king High School lakwas yang sinugpo
Ding keyang parangal lalu lang miglapo
King pamibabata e na ku meniglo
Mayumung taguimpan nasa na’t talindo.

Makapagmulala ngara ring mapilan
Nu’ na amana ing tagle nang kabyasnan
O’t katni na buntok, ni’ng keyang pegmulyan,
O’t mipagkaluban yang makanyang belwan?

E ku na balu ing kanakung pakibat
Ding sablang mangutang e ku no ayawat
Ing katni nang buntuk nu’ na kanu ibat
Mipamulala la n’yang akung mekibat.

At ngakung mekibat, maniglo ko kaya
Nung sabyan kung tapat akung pegmulyan na?
Panupaya na pa king Mal kung Asawa
Pabustan na ku pa king ka’kung Poesya.

SiualaNingMaliwalu #AnakNingBaculud