Payul ku karetang magnasang makiabe
E ro paimburisan retang maglalage
Lakwas nung lagyu na pambengi ya kule
Patdan mi yang agad ing sulu ning bale.
Nasa mi tagana, ala keng kilingan
Idake ing ustu’t alang pangilagan
Pakit ing katutuan para keng Aguman
E dapat lilingad at e salikutan.
E mo pagmaragul, reng kekang inambag
Nung ding purutas mu, e mo buring balag
Inya ukulan mi, ayup kang masipag
A balu mo bini, reng dapat isalbag.
Anya sikapan kong banten reng mamulut
Tuldu ku karela reng e pa malulut
Uling ing layun ku karetang mamutut
Ing yapsa do butul, ding e ra alangut.
Panupaya mu sa’ ngeni ke pa biklat
Ining kakung libru king kekang panagkat
Nung tulutan mukung abe ta’lang mamwat
Reng awsan kung alas kening kakung pangkat.
Maganaka no man at e buklud-buklud
Lakwas king amanu asno king kalugud
Uling e la saneng kabud na magpanyud
Karetang mangurus ampon sisiklaud.
Paglualu de at tune pagmaragul
King amanung Sisuan e mo apakurul
Wari mo keng lubid nung surian me buknul
Anting bingut, kang Indu na maka-kaul.
Ining sinulat ku metung yang pawaga
Nung bakit ngeni pa aisip minatba
Uling king milyari, kile ku minatnga
Anya makanyan kung mekalalang kudta.
(neng WakaOjie Mangalindan Pena)
* 03 Mayo 2023 *