Misan queala’ na capilmi-an ning bie
cabira-bira ya manaliua asque
alang capiadian e mu male-male
ating menibayu caring bage-bage
a pauli niti linisia ne dane
ing sadia nang daclat nung nuya pabebe
caministilan mu mangcup ya’t magbate
segun queng ocasiun maliua ya tage.
Napun queng pusu mu dit man alang duda
sanac me pangimut bucas nung sunlag ya
wari sa queng bagiu corcula me puersa
pulai na angin, bulus ning uran na
dapot mecabulad midin yang curbada
ing panimalad mu bina yang sinala
at queng e mu malit ing sinial nang darla
queng malas liuas ya queng quecang aguanta.
Ya pin ing batas na pandurut ning yatu
sasacup quenu man bilang reglamentu
nung atin pang bague metung e magbayu
“mamalis ing sabla queng balang segundu”
iti ya nang utus matua pa qng tau
ibat qng samula libu nang mil aniu
pablasang gulis ne ning planung diseniu
iniang malalang ya qng pala ning Ginu.