nang Apung Gusting
6/27/18 Riyadh
12 silaba, 5 linya, 8 estropa
I
É tamu álingad at é ápayalian,
Atin támung bisyung likas king katáwan.
Taladtaran ku la’t binang saglawáyan,
Páuna ku na pu é ku pu sasarian,
Mangilag nyamu ing é bisang mituran.
II
Ábak pa’ng maranun malangi nó díla,
Anti la mo uaring talapamalita,
Alâ mang katutuan at keraklan léla,
Nung é man pinyaglap at tantung pikatsa,
Ining indredus dang sasalbag king malda!
III
Kening bisyung ayni daka’lang mewili,
Pulis at sundalus bantug la kaniti,
Misna lang meguna keng miusung ayni.
Sukad ne mo kanu ning pangalalaki,
Ustung manyese kang ayup kulasisi!
IV
Pané ngan báyu ing piblas dang imálan,
E mo atauli keng moda at sosyalan.
Maki-alkasan la karetang atinan,
Aggiang e ra aggiu, pilit dang kakaulan
Magápe lá sana, kuma lang ornalan!
V
Ati’nomang bisyu ding aliwang matua,
Kaybat ning paugtuan mipapanagkat la,
Mikit-ikit ketang arap ning lamesa.
Ati’nang maliswas maynip nó nandin pa.
Alang sangga-sanggâ rambol ing buri ra!
VI
Déning kabarkada nang apu Sampedru,
E mo man atauli king karelang bisyu,
Ume la keng mísa kaibat dang meugtu,
Agyang lumbe lá mu’t é mustang interu,
Manakit lá’ng dayâ asmu no kaswelu!
VII
Ing aldo ning pyesta malapit na naman
É mu man asabi ing é ra pagsadyan.
Agyang kuma la mung atlung takalanan,
Palto at palto lang ‘yapag a pamangan
É lá sa’ mabasyu ding bisitang datang!
VIII
Dening mengatungge, tutu, e alingad
Kultura lang disan king kekata’ng labuad.
Dapot karing bisyu e tamu magbábad,
Mabyasa ta’ng lisya, neng misan titiplad,
Milele ‘gyang dimut, ban e ta’ malupad.