ing bulan Nobiembri mayangin yang bulan,
bulan ning burarul, bulan ning kalísan,
malbe ku pang atbung keng trak da lululan;
keng bariu mi ita ing kanakung disan.
kaparang anak ke kanita i Mona
king kekaming bariu karin Mining kan’ta:
mediu e maingat itang pangalo na
dapot ing pusu ku ‘yang gale na’t kanta.
misan kayabe ke king bulan mayangin,
atin kung burarul at iya man atin;
anting balu na ku isipan ning angin,
biniru ne niti paldang mala-satin.
sangkan la mong tùla reng mata kung bural,
ginut na kung Pedrung migunyat king kural.
07/07/21 /12:44
kabang mamangan keng mr. frosty
***megawa ya pu ini bilang ersisyu keng rimang “sunis a sakdal” a gagamit padrun rimang “barikilan” o liwasan (a,b,a,b) (c,d,c,d) (e,f,e,f). anggiang miririma la pu karas keng simpling pamagrima, pero uling “sunis a sakdal” ya ing rimang ginamit inia e la pa mu rin mababaldug keng a,a,a,a; b,b,b,b; c,c,c,c deng rima, nune ken lang a,b,a,b; c,d,c,d; e,f,e,f a padrun rima mababaldug.
digdagan ke pung kambal bersadang paniara (g,g)
***tùla – mayap, masalese, matinu, matenakan