Mala-soneto
*
Ing bie na ning tau king yatung karinan,
mengari yang kantang maki kapupusan.
Bisa ya at ali sukat nang tanggapan,
muli ya king gabun a kayang ibatan.
**
Likas king tau ing e ya bisang mate,
ing buri na alang angga ing kayang bie.
Ania migkapilit yang mibulebule,
ban ing kamatayan sa apirayit ne.
***
Datang ing pinandit, balu na ing iya,
mapatlud mu naman ing kayang inawa.
Ania pepanualan na ing sarili na,
ing atin pang kaduang bie a manenaya.
****
Ing bie alang angga pigawa na ya mu,
ning taung tatakut makiarap king tutu.
Rodel E. Gozum
12 Enero 2016
Munoz, Quezon City