E tamu dapat manaliwa ampong lalaut king tema. Ini sakit de ring marakal a makudta. Pelalung detang maluat nang susulat ampong miputungan nang galal, maralas dang gagawan ini. Ding makanini pu, nung e tamu maingat king pamanyuri, neng misan e tala apansin.
ALIMBAWA 1
King atin makule’t, patda-sinding sulû,
akilala ra ka’t, asilu me’ing pusû.
At king lugal da ring, mamisaling lugud,
segipan da ka king, kekang pangalumud.
Ing milabas mu a, mitmu king dalumdum,
kelinguan ku na at, petuki king napun.
Ing bakas ning burak, king pangatau mu,
ban maos binie ke, keka ing lagyu ku.
King abut ning kakung, dimut a kagiwan,
depat ku ing sabla, ba dakang pasayan.
King pagkerang lande, uling e ka sane,
Belikan mu itang, asanayan mung bie.
Aliwa ing lugud, nung e ing kanawan,
atantu kung iyang, kekang pagdulapan.
At king lalam da ring, patda sinding sulû,
dakal a pupuntang mantun mangalagû.Surian taya ing poema babo. Ing tawling estropa malaut neng bagya uling ala yang kebaluan king tema na ning kudta. Ing tema na kasi ning kudta, tragic yang istoria ning lugud. E ya dikil king nung nanu ing panintunan da reng parukianu karing lugal a makanian.
ALIMBAWA 2
1
Ustung mampit na ing aldo na ning Pasku,
magmasusi ya ing mabilug a yatu.
Misasanmetung la ring dakal a tau,
king aldong misapuak ya i Hesu Kristu.
2
Sinakripisyu na, ing kabud namung bie
ban kapilan pa man ali tana mate
King kayarian banua karin tamu ume
nung nu alang danup at ala nang lumbe.
3
Ding makasarili at sari king kaimut,
sasaup la karing king kabiayan dimut.
Anggiang ding aliwang ditak mu apalut,
mamie la pa karing memunlang e linsut.
4
Anggiang ding kriminal a mistulang lasip,
magtunud la ngan king aldo ning minyagip.
Ding pulitiku man a marawak sip,
maging mayap la ban ala tang asilip.
5
Ding mayakayan at labis a kabiayan,
panikuanan da ing dakal la asopan.
Anggiang ding artistang misna king katasan,
magpakumbaba la’t sasaup mu naman.
6
Nung aldoldo mu ing aldo na ning Pasku,
matula ya sa ing mabilug a yatu.
Alang sunggalitan at ala ing gulu,
uling lugud itang magari king tau.
King kawatasan babo, ing kaduang estropa melili ya uling ing tema na ning poesia Pasku, e maleldo.
ALIMBAWA 3
1
Potang mapulid na ing kakung inawa
at ipiak ku nala ring adua kung mata
ban e no mibuklat angga na king angga
ing panabilin ku tandanan mu sana.
2
E mu ku dadala kilub ning pisamban
ban pabendisyun me ing kakung katawan
Nung gawan mu iti ing kekang depatan
inumis mu mu ing kakung kapanualan.
3
E mu ku lilele king ninuman parî
o karing pastor a mangayumu labî.
Nung kanita ren e ra ku apatukî
lakuas na pa ngeni king kanakung bilî.
4
Nung e ku penualan aniang mabibie ku,
ing panaral da king babo ning pulpitu,
ngeni pa mo kaya a pagulut naku,
ban e na magbalik king karinang yatu.
5
Ding para kung tau, kaku lang liguran,
at sinopan kula retang mangailangan.
E ku migmalabis, anggiang misan mu man,
at ala kung taung dilpak katuliran.
6
King sasaglawe ra e ku rin manualâ,
nung alang patutu’t amanu mung pawâ.
Uling ing tutung bie nung surian me mu sâ,
ing sasambitlan da malaut a binâ.
King poesia babo, malaut ya king tema ing kalimang estropa uling ing tema dikil ya king kapanualan, e king dapat na ning magkuentu king poema.
Ania pasibayuan ku, magi tamu pung maingat king pamamalangkas. E taya alilan at e tamu lalaut king tema ban alang malili karing estropa tamu.