nang: PL Sergio Gramonte Calayag
Makananu mung asabi, menagumpe nakang ganap?
Kening bie mung pakamalan iya ini ing atanggap
Keng pibandian at kanawan, kasaplalan ing pigagap
Kabud ini iyang kimtan, at mikabie ketang mayap
Peninapan keni nang bie, ing mikabieng masaplala
Memagaral keng escuela, at mekayari yang karera
Megobra at migpamilya, mikabaleng magarbo pa
Dapot keang panandaman ating kulang kening bie na
Minasensu keni nang bie, ayabut na ing parasan
Nanu man buri kening bie, iyang tutu nang akamtan
Memaglakbe keng marayu, aliwang lugal yang disan
Dapot, ketang panandaman, panandam na atin kulang
Sasabian da ding aliwa, e makuntento ing tau
Tutung ating kakulangan agyang nanu pa’ng gawan mu
Tune iyang panintunan, e ne akit ‘gyang gawan mu
Ala kayang kapasnawan nung e biasang makuntentu
Keng bie ning metung kristiyano, iya ing mikabieng ganap
Kabud Guinung Jesu-cristo iya ining kayang tinggap
Tune alang pa’intunan pa, keti babo niting labuad
Kuntento ya keni nang bie, tayimik ya’t e bubulad