nang: PL Sergio Gramonte Calayag
Palbug ne ing aldo, king bandang albugan
Malili kanita pisak ning kabengian
Deta nang insekto, ketang karatunan
Deng karelang gaga, ila reng damdaman,
Payapa’ng paligid, tutung panandaman
Ngeni mamigunam, kening tatangalan
Itang banuang matas, binie ning Miglalang
Makapagmulala, leguan nang dadalan
Kabuklat ning abak sumlag ya ing aldo
Babie yang pagasa, keng pusu ning tau
Kipmuang kapanayan, manalig king Guinu
Ketang patingapun atin pamagbayu
Laganas ing sala, keti babo yatu
Alang pipilinan, makualta’t kalulu
Iya ining dasan ciudad man o baryu
Keng nanu mang lugal, malapit marayu
Dapot itang aldo, anti ya keng tau
Itang kayanakan, abak yang akit mu
Ketang ugtung aldo, sikanan yang atsu
At ketang payalbug, mate ya ing tau
Makanian ya’ng tau, mibait ya’t mate
Dapot ing ulaga, tutung madalise
E anting sampaga, malanat, mipase
Itang kayang banglu, mabating ya tagle
Ating kabaldugan ing bie na ning tau
Itang kayang aske kawangis ning Guinu
Tutung mayulaga keti babo yatu
Inia pakamalan, makamal a bie mu
Palbug ne ing aldo, king biga magpanpan
Ketang patingapun memie kapanayan
Ing bie na ning tau, makanian ya naman
Pakamalan nang bie, kipmuan kabaldugan