nang: PL Sergio Gramonte Calayag
Nung nanu man ing milabas kening bie mung pakamalan
Iyang dake nitang napun, atin aral a malakuan
Pablasang ‘yang milabas na, e mibalik ‘gyang na’ng gawan
Anti nang kasalesayan, iya ining pisasabian
Ing mewala at mebating, nu man anti kayulaga
iya ini ing kalinguan, ban e babayat ing karga
At nung iti panintunan, itang oras masayang ya
Anting yang metung karayun, buntun are pa’intunan ya
Inia ini iyang aral, itang bukas yang arapan
Talakad kang pasibayu, kabuklat ning kayabakan
‘yang babie bayung pagasa, ban mangat ka keng kabilian
Kipmuan tapang kang mamarap ketang amun a daratang
Itang napun a milabas, misan misan yang balikdan
Detang aral a pemulat ilang gawang dalerayan
Malungkut man o masaya deng aral na ‘lang gamitan
Uling keni ka mabiasa, ban tagumpe iyang kamtan
Inia e ka dapat tuknang ban ayabut ing tagumpe
Nanu ya man ing denasan, ilang dake na niting bie
Anting metung a escuela ing kabiasnan yang dadake
Kareng anak a magaral ketang beluan do sasane
ccto: