(KAPIBABATAN)
Makuyad A Poesia
Irvin Harvey Rivera
Siuala Ning Maliwalu/Anac Ning Baculud
February 12, 2018

Paynawa, matudtud, kaybat magobra na
Makanyan ing biye ning metung talasawa
Nanu mang linutu, epag king lamesa
Mangan ku, mangan ka, e ka ta’ sumala
E masulit ta’ng ‘biye’ing oras king Pamilya
‘Gyang dit’ nang panaun mitagan keka ta’.

Magalmusal abak e na yata usu
Mangan ta’ nang dakal a nasi neng ugtu
Magsilbi nang galut, imalang e bayu
Keka ta’ng sarili, e ta’ na sikasu
Muli ka ta’ng adwa king bale daretsu
Ala nang panaun ing maglimbang tamu.

Atin ka ta’ng anak susundung pagaral
Banwa-banwa la nung manuling parangal
Ing dimut tamung biye e meging sumbagal
King ding adwang anak e ta’ no pagaral
King bie maningalma, e ka mu marapal
Ing lakad ning oras, e ya matigagal.

Neng aldo ning sweldu, malagwa nang muli
Intrega ku no’ ring sweldu kung malati
Ing bungsu salamat, titiman ya’t mayli,
Titiman ku naman at mumuma king pisngi
Ing tula ta’ng adwa maglapong piragli
Patingapung obra, king pagal mibawi.

Ing bengi keka ta’ wagas yang pinandit
Kaibat na ning pagal king biye a masulit
Mikutkut ku man king biye ku maginakit?
E ku magsisi man nung ing bie masakit
Uling balu ku king Guinu ku kulayit
Ngening benging ayni, mibatyo ya’t mampit.

SiualaNingMaliwalu #AnacNingBaculud