Lorung Malabit
Silaba 16 Linya 4
Parapu 6 Sesura 8/8
*
Metikal no ring gamat nang, malambat nang makapalad
king pamangadi nang sana, magbayu ing kayang palad.
Maklak ya’t pakang ing banua, e daramdam, e bubulad,
e sasalese ing bie nang, malambat na nang papalad.
**
King kakalakad pasiklod, mepupud no ring kayang tud,
dapot e padalang lamak, ing dios kanung mitmung lugud.
Babo ning tudturang kartun, potang pakat ne ing gulut,
ing titigtig king kabengian, ing atian nang gagalukguk.
Kamulagat ning masala, nung gisingan ne ning dimla,
pasibayu talakad at, talanga ne naman banua.
Maglubid yang panalangin, a king pamamulut lata
makatupa ne sa’ng grasyang, pakibat king pangadi na.
At misan pa iguyud ne, ing katawan nang salunan
a ginupu king dusa ning, bieng e kulang king sipagan
Ding bunduk da ring basura, laganasan nong kalkalan
ban king kalibung ukdu ring, pago mabalag no naman.
Aniang mampit ne ing bengi, king kabud santungang kartun,
migsale yang pasibayung, ing bubungan na ing ambun
Ala yang maleng ing bie na, dake na niamu ning napun,
ding pangadi na at iya, mitambunan na lang gabun..
Kasumangid na ning dalan, atin maragul a bale
Ding lamesa’t paninggalan, lalapo la king pagkabie
Uling dakal ya amana, king salapi ya magdase
ing makibanding misan man, e mengadi king kayang bie..
Rodel E. Gozum
22 Enero 2014
Munoz, Quezon City