neng: oliver carlos
Ibuclat que queca ing laman ning salu. Metung mung bague.
Balu mu nung macananu
Ing tatalanga quing cucusad a bulan cabang iti dadalaquit ia caring macabaiutuc a sanga ning cabengian;
balu mu, nung adudunut cu man ing abu na ning dapug a bibie pali quing cacung catauan, iti pauli namu ning isip cung ica mu cabud ing balicbalican. Balu mung napun… ating iacu, ating ica. Ating icata.
Balu mu nung baquit
ing sablang bague aninagan at sasalatan pane ngang macaugne queca:
sala
dalumdum
dicut
pilapil
dutung …
deti bangca la uaring sasadsad, mimimpil quing pampang ning salu cung manenaia quing quecang paniatang. Balu cu naman, ing capanaian, nung misan, mamungang cabigwan.
Balu mu nung nuanti casaquit:
Ing paquiramdam ning migaganacang misan a yaldo, macalale mauala ing lugud. Na wa man at sasabian cung nung emu nacu caluguran, banaiad cong ilacad ding painggulut cung tacbang. Balu cung balu mu, sasalicut cu mu caring timan ing pamanginayang.
Nung calinguan mu cu
Ibuclat que queca ing laman ning salu:
Ena ca babaliquid,
Ban mandatila quing isip
a quelinguan da naca naman.
Dapot…
nung quing balang aldo,
o quing balang oras,
agaganaca mu ing pisulu tang lugud;
nung ding balang sampagang ayayagtal mu, papanik mu la at pasayad caring quecang labi ban damdaman pasibayu ing pali ning uma cu, o’ cacung pacamalan,
gumapang pabalic ing api
ning lugud cung e mitda
o melamlam capilan man.
Ibuclat me ing salu cu… ing lugud mu
ya ing sangcan nung baquit lulugud cu.
- Mayo 10, 2023