nang: PL Sergio Gramonte Calayag
Ing babaing kapampangan, ketang kayang pangatau
Bibitbitan na ing leguan ‘liwang dili babo yatu
Tune kaya mayayakit, ing larawan na ning Guinu
Iyang kipmuang kabanalan, malinis ing kayang pusu
Nung ika ing mamisita, keng malukang pagkarinan
Malinis pibalebale, akit mu ing kasinupan
Itang eran niting bale, aldo-aldo yang isisan
Lande kuayan yang kikintab, bulung saging gagamitan
Ketang kilual ing kusina, ing banggera at dalikan
Tatangab man ketang dutung, alang kalat pagkalangan
Pakasakub lang kalderu, pakalele la reng kuran
Makanian yang kapampangan iyang kipmuang kalinisan
Nung atin bisang maglolo, kaya makipagkilala
Pabalu da keng pengari, potang ila rening munta
Ilang mamie pang abisu, tumulid lang mag-harana
Kabud ila reng metanggap, akilala ing dalaga
Potang iyang papanikan, maka-oras itang dalo
Makabante ya ing Tatang, ketang balkun makatando
Ipalkas ning baintau sumuyu yang akakit mu
Mipawas yang maralekat, ban kanita apatangu
Makanian ya ing dalaga, ing babaing kapampangan
Anting diamanteng makamal iyang tutung pakamalan
Masinup keng pamibiebie, pangatau yang ingatan
Babandera babo yatu, ing puri na at dangalan
(Modelu ke pu I Atse May Gosioco ning ArtiSanta Rita, salamat pu)
Enero 3, 2023
