nang: PL Sergio Gramonte Calayag
Kukutnan ke’ng sarili ku, nung mikit pang pasibayu
Keng keluatan ning panaun, tutung dakal na mibayu
Aku ining manenaya, e ke sera ing pusu ku
Manalig ku keng sinabi, kanaku na yang pengaku
Aku, ing keang balikan, iya namang panayan ku
Makalawe king alaya, ining melumbe kung pusu
Panaun na ning kauran, keting lugal ming penitan
Tune ra kang aganaka, O, sinta kung pakamalan
Atsu ka man king malawut, e ayabut agyang dit’man
Dapot ining kakung diwa susulapo king kawalan
Ika ini ing darasan, mangomusta keng kabilian
Kening isip e mebating, yumung lugud makalulan
Keng kanakung kaisipan, tutung e ku akalinguan
Sinumpa kang magbalik ka kening baryung pakamalan
Mitalanan katang gamat, matigik mong sasakmalan
Saka ika’ng mengamanu, aku ini ing balikan
’nia ika’ng pakibalitan, kareng kekang kaluguran
Balamu akalinguan mu, manaya mung kaluguran
Ing pusu ku yang melumbe mebayat ku panandaman
Kabud ika ing ginulut, ining lua ku dinagus ngan
Sinagese kening lupa, anting sibul e tutuknang
Buri daka sang tagalan, ban kanita apigilan
Dapot ini eku gewa, masira ka paintungulan
Tenam ku na kening lub ku, itang aldo yang panayan
Manaya kung ‘lang panayan, milalako ku pagasa
Pengaku mu magbalik ka, dapot ngeni, nukarin ka?
Babalikan ke ing baryu, pati ing mal tang escuela
Babakasan ing milabas, ketang lugud nung atin pa
Ing diwa ku susulapo, akit sa’ng malagung lupa
Nitang sintang pakamalan, kukutang ku, nukarin ka
Ketang kakung pamamasyal, keng bisitas niting baryu
Ketang abak a maranun, ing menakit kung alino
Apangsingan makagulut, kinarug ya ing salu ko
Linapit ku ban yang lawan, nung ini pin iyang tutu
Kalapit ku, linawe ya, mipakurut kakung pusu
At mikawul kaming adua, dinatang ya ing sinta ku.