( The Lord’s Prayer )
( Poemang Pangadi )
nang Jose Roman Reyes Laquian
2:05 AM Biernes 18 Julio 2008
IBPA MI ,
ABWOON*
Panalangin da ring addua ,
Atlu , apat o maiguit pa ,
Pamagbati ding pamilia-ng
Sasamba Quecayu , IBPA . . .
Panalangin ning iglesia-ng
Manalig Quecayu , IBPA ;
E para queng yatung tata
Nune Quecong IBPA banua . . .
O’ Mabie DIOS nang Abraham ,
DIOS ding quequeng pipumpunan ,
ACU ING ACU –– Laguiu-ng Nuan ,
Icayu’ing quequeng Papurian ! . . .
ATI CAYU BANUA
D’BWASHMAYA* ,
E queng gabun nune babo ––
Carin qng banua-ng matilo ,
Carin ya ing Quecong trono
At ing Lugud Yung lalapo . . .
E caring atmosperica
Nung nu ding ayup atiu la
Ni qng mabatuin a banua
Pagdatunan ding planeta ,
Nune qng pangatlu-ng banua **,
Carin , IBPA mi , atiu ya
Ing trono Yung masna gloria ,
Qng banal Yung catlu-ng banua **. . .
PASAMBA YU ING LAGYU YU
NETHQADASH SHMAKH* ,
Banal at Sagradong Laguiu ,
” Yahweh ” Ya’ing Laguiu Yu , Guinu . . .
Ing cabanalan Yung tutu
Qng panga-DIOS Yu cacatmu ! . . .
Pasamba Yu Ing Laguiu Yu
Quequeng anac Yu queng yatu ,
Qng Cabanalan bandi yu
Miuangis que pangatau .
Pasamba Yu Ing Laguiu Yu
Lalam banua , queti yatu ;
Magbie – banal caming tau
Anti ning Cabanalan Yu . . .
DATANG QUECAMI ING PANGA-ARI YU
TEYTEY MALKUTHAKH* .
Magugulu ya ing yatu ,
Malilili la ding tau ,
Mabibie la queng e ustu ,
Cailangan da ing Saup Yu ! . . .
Oini’ing yatu-ng magcasaquit
Qng casalanan pasaquit ,
Ing quetauan mamalipit
Qng casalanan manyipit . . .
Datang ya ing ca-ari-an Yu
O’ Guinu-ng DIOS , quequeng tau . . .
Ing mung Capanibalan Yu
Ya’ing Capanayan ning yatu ! . . .
PAPAMINTU YU ING LUB YU
QUETI SULIP ANTI BANUA .
NEHWEY TZEVYANACH AYKANNA
D’BWASHMAYA APH B’ ARHA* .
Ining ” sulip ” a amanu
Ali ya’ing gabun ning yatu ,
Nune , gabun meguing tau ––
Gabun – tau-ng lelangan Yu . . .
Ahhh . . . tinanggui la ring tau
Qng Lugud Na Ning Anac Yu ––
Caring Batas At Amanu
Ibat caring Nuan Labi Yu . . .
Papamintu Yu ing lub Yu ,
Ding Batas Yu at Amanu ,
Mamintu cami qng Lub Yu
Ique-ng lelangan Yung tau . . .
ING CACANAN MI QNG ALDO-ALDO
IBIE YU QUECAMI QNG ALDO NGENI
HAWVLAN LACHMA D’SUNQANAN
YAOMANA* .
Ding ayup qng calauacan
E la ngan mananaman man
Dapot Ing DIOS ta’ng Miglalang
Lilingapan No’t pacanan ! . . .
Ing ca-ari-an Na Ning DIOS ta
At pati catuliran Na
Ding pa’intunan ta’ng mumuna
Ban gracia Na tanggapan ta . . .
Nung ing banal Nang Caburian
Ning DIOS IBPA ta’ng Miglalang
Ing aldo’ldo ta’ng pamintuan ,
Aldo’ldo ta’ng mipanuanan ! . . .
AMPON IPATAWAD YU QUECAMI
ING UTANG MI QUECAYU
ANTI MO ING PAMAMATAUAD MI CARING
MICAUTANG QUECAMI
WASHBOQLAN KHAUBAYN AYKANNA DAPH
KHNAN SHBWOQAN L’KHAYYABAYN* .
Bayu que marap Quecayu ––
Queng Trono Na Ning Gracia Yu ,
O’ DIOS iqueng turuanan Yu
Magpatauad bilang tau
Caring micasala-ng tutu
Quecami at miparayu ;
Turuan Yung maquicasundu
Cami carela , O’ Guinu . . .
Ding quequeng pamicasala
Ampon sabla ming utang pa ––
Patauaran Yu la , IBPA ,
O’ DIOS IBPA-NG MAYUPAYA ! . . .
MANGA E YU QUE IPAISAUL QNG TUCSU
NUNE ICABUS YU CAMI QNG SABLANG MAROC .
WELA TAHLAN L’NESYUNA .
ELA PATZAN MIN BISHA* .
Tune e que micatucsu
A e denasan ding tau
Dapot qng Saup Yu , Guinu ,
Mirayu que caring tucsu . . .
Saupan Yu caming magbante
Qng diablo-ng mapagsalaque ,
Anting leon yang mumungul . . .
O’ DIOS , e Yu que paisaul ! . . .
Quecayu , O’ Mal ming Guinu ,
Que pasacup , e queng diablo ;
Alti’ng diablo ya’ing darayu
Qng Laguiu Nang JESU CRISTO ! . . .
ULING QUECAYU YA ING CA-ARI-AN ,
ING UPAYA AT ING GLORIA
ANGGA QNG CAPUPUSAN NING YATU ,
DARING SABLANG YATU .
METOL DILAKHIE MALKUTHA WAHAYLA
WATESHBUKHTA L’AHLAM ALMIN* .
PecaMatas at Mumuna
Co’ng Mamanginu qng banua .
Nung e Icayu , O’ IBPA ,
Alang Macayupayan pa ! . . .
Quecayu ya ing Upaya
At ing Gloria-ng Asmu Sala ! . . .
Maina’t ala queng upaya
Nung e’ibat Quecayu , IBPA ! . . .
Quecayu langan ding gloria
At ing yatu magdeclara
Para Queco-ng alang angga-ng
Gloria , IBPA mi qng banua ! . . .
YANASA .
AMEN .
DIOS ming Cacatas-Catasan ,
DIOS ming Mabie Capilan Man
At ing Quecong ca-ari-an
Manatiling Alang Anggan ! . . .
Ing YANASA ming pangadian
Qng Catutuan Yu sambitlan ;
Icong quequeng panaligan
O’ DIOS IBPA ming Miglalang ! . . .
Ing YANASA ming pangadian ––
O’ DIOS , Queco ya’ing Ca-ari-an ,
Upaya , Gloria’t Dangalan
Ngeni’t Qng Capilan Pa Man ! . . .
Capabaluan :
- * Ing Pangadi Ning Guinu ( Guinung JESU CRISTO ) a misulat qng dati o sadiang Amanung Aramaic cambe ning Queang Cauatasan a lelanga’nang Poeta Jose Roman Reyes Laquian qng Amanung Capampangan/Sisuan .
Babie na ning malucang poeta ing PecaMatas a Papuri , Gloria at Dangalan Qng DIOS IBPA , cang Guinung JESU CRISTO , at Qng ESPIRITU SANTO Ngeni at Qng Capilan Pa Man !!!
PainDISPU at babie Mayap a Oras quecayu ,
Ca JR
pangatlu-ng banua ** / catlu-ng banua ** ( Capampangan ) = third heaven ( English )