nang: PL Sergio Gramonte Calayag
Nung parati kang maninap, at e ka bisang gugunyat
Ing panikuanang tagumpe, e ya datang, tutung maliap
Inia Ika ining kimut, ban matupad ing paninap
E na kabud manenaya, at mabaldug kekang arap
Nanu ya man ing parasan, nanu man ing pakiabutan
Migising ka keng katutuan, aminan mu ing kabilian
At karin ka magumpisa, nung wari sa ketang eran
Itang mumunang balitang, iya ining munang tukluan
Keng tiaga mu’t pamagsikap, ayabut me ing tagumpe
Ketang ustung pamaralan, at deng taung mamalale
Keng paralang masalese ilang dalan keni nang bie
At tuntun ka keng matulid, ban kanita e mipase
E alisyan nung misakab, ketang dalan ka mipase
Talakad kang pasibayu, at lumakad kang manene
E pabustan damusakan, at mikutkut kaba ning bie
Ilang gawang dalerayan, ban ayabut ing tagumpe
Iyang metung paganaka, ing kuento na ning Juan Tamad
Itang biabas a malulut, panenayan neng manakbag
Agyang ini yang ayabut, tune e ya bisang gunyat
Inia kabagsak na ning biabas, iya ining kipmuang ulad
Katamaran iyang lisyan, ban ayabut ing parasan
Umpisa keng munang takbang, keng malawut a lakaran
Kabud ini iyang gewa iya na ing ayumpisan
Itang kekang pakiabutan pilming ini iyang dasan