Macuiad A Poesia (Tragedy)
Irvin Harvey Rivera
Siuala Ning Maliwalu/Anac Ning Baculud
June 15, 2018

Qng lalam na nitang tanamang Almendras
Carin ia sinubul, pamalsintang Uagas
Queca pengacu cung e mirinang uacas
Maiumung lugud ta’ qng pusu miaptas.

Carin to dinuquit ding queca ta’ng lagiu
At cambe na nitang ginulis mung pusu
Anti ia mo uaring tutucnang ing iatu
At ing balang oras miguit ia qng Guintu.

Qng lalam Almendras pisuluan ta’ing lugud,
Madalise’t Uagas at e mapapatlud
Pengacu mu ca’cung acu mung bucud,
Ing sinta mung tune, a queca malugud.

Migbaiu’ing panaun cabud mecalinguan
Maiumung pinandit qng lalam tanaman
Menasa, ing lulam catuqui na uran,
Alang patnang tucnang at anging masican.

Macanian ia, mecad, ing peintungulan na
Ning sibul a lugud at nuang pamalsinta
Cabud melumpaui at cabud mebura
Qng lalam tanaman, carin, mig-uacas ia.

Qng lalam Almendras carin dinuquit que,
Maiumung milabas at ding tagulele
Carin cu no lacuan, carin cu no iugse
Qng lalam tanaman, carin uacasan que.

SiualaNingMaliwalu #AnacNingBaculud