Neng Al Pedroche
(Ala una ning gatpanapun)
Y tata cu, memulut ya’ng
Batu’ng masura’t marinat,
Batung ala mang ulaga, uling mibalut no’ng burac.
Ngaco: tatang na’ng gauan mu careng batung alang silbi? “Manenaia camu anac, at acquit mo’ng quislap reti.”
At qng bale, pecauas no retang batu’ng peniamput na,
Inabe no quetang
balas a macaque quetang lata.
Balas canu yng pumulis, careng batu ban lang quislap, at timpac ne qng maquina itang latang ating balas.
Patingapun yang dudurut yng maquina at reng batu, milabas yng pilang aldo at minabut paruminggu.
Aniang biclat na neng tatang y’tang lata’ng maqui batu,
mibalag la qng lamesa, quiquislap lang anting guintu!
Y’tang tau, burac tamu’ng diclut na ning Apung Guinu, qng upaia at lugud Na ania tamu maguing tau.