Keng masayang kayaldawan da reng Indu tamu….
Ala nang aliwang panintunan keng bie
Lugud na ning Indu pane manantabe
Nung mipalaut man, ing pusu malumbe
Pane meng isipan, agad akit mu ne.
Lungkut panamdaman potang ala na yu
E mu na arapat nanu mang gawan mu
Buri mung paramdam uma at kaul mu
E me man atagkil, ‘giang siping mu atyu.
Mangilid ing lua ku kabang gaganacan
Dinake mung tula e ku kakalingwan
Lugud mu at lingap memie kapaldanan
Indu na ning bie ku, kakung kaluguran.
Dacal a salamat, Indung alang pagal
Kening binie mung bie, ing lugud mimiral
Ala yang kapante ing pusu mung banal
Ipangadi ra ka king Guinung pekamal.
🍃 tulang ning magalang 🍃
(melanienaguit10may2018vicenza)
Letratu: Joanne Naguit Tuazon and Nathalie Cole Santos
