(King Abe Ku King Bie)
Lorung Malabit
Silaba 12 Sesura 6/6
Taladtad 4 Estropa 8
*
Potang mapulid na ing kakung inawa
at ipiak ku nala ring adua kung mata
ban e no mibuklat angga na king angga
ing panabilin ku tandanan mu sana.
**
E mu ku dadala kilub ning pisamban
ban pabendisyun me ing kakung katawan
Nung gawan mu iti ing kekang dapatan
Umisan mu mu ing kakung kapanualan.
E mu ku lilele king ninuman parî
o karing pastor a mangayumu labî.
Nung kanita ren e ra ku apatukî
lakuas na pa ngeni king kanakung bilî.
Nung e ku penualan aniang mabibie ku,
ing panaral da king babo ning pulpitu,
ngeni pa mo kaya a pagulut naku,
ban e na magbalik king karinang yatu.
King sasaglawe ra e ku rin manualâ,
nung alang patutu’t amanu mung pawâ.
Uling ing tutung bie nung surian me mu sâ,
ing sasambitlan da malaut a binâ.
Pagumasdan mula ring taung daranup,
alang miglalang a karela sasaup.
Mamangadi la man at king banua durup,
sabo man marimla ala lang a-ilup.
Atin mibabayit a kulang talirî,
ampong adua buntuk at metung mu labî.
Nung atin ginu a kekatamung arî,
o bat pabusta’nang makanian lang mulî?
At nung tutu man ing sablang panaral da,
e ku na nabangan uli ning tawli na.
Magi nang piyalben nung aniadwan mu pa,
ing kapatawaran ning kakung kaladwa.
*mulî – ing mulî pu keni e ne man mangabaldugan a mulî king pibale-bale o king lugal a ibatan. Ing mulî pu keni ing kabalduga’na “kerasan o kerasnan.” Mengari mo pu king taladtad a “Magkanu lang minuli ring kualta” a mangabaldugan a “Magkanu la kerasan ding kualta.”
Rodel E. Gozum
04 Marso 2019
Munoz. Lungsud Ning Quezon