nang: PL Sergio Gramonte Calayag
Kanitang minuna kareng sibabaryo
Kareng siping bale ilang makabatyo
E na man indredus pakibaluan ustu
Nun’e itang asuk panayan yang lunto
Ketang pagkalangan karin la magluto
At nung alang akit dalakit yang tutu
Keng pamandalakit keang bibitbitan
Abias keng salikap, iyang pupuntukan
Pablasang ing asuk iya ing sukaran
Ining siping bale itun ala ya man
E mag-aduang isip, kasaupan yang iduang
Makanian kanita, lugud pairalan
Kipmuan malasakit, lugud at masabal
Keni nang pamilya iya ing panaral
Papakit keng gawa, karelang pakamal
Ali keng amanu, parating sasabian
Nun’e alimbawa dapat pamarisan
Datang ing panaun iyang pakiapusan
Ilang abe-abe nanu mang kimutan
‘lang magpatumbalag, alang malalakuan
Inia balang metung, babie ing kasaupan
At kaya nang ‘palkas ing kayang kagiwan
Bitbit keng sarili, itang kayang dangal
E buring masira, o yang mirinatan
Karas ketang obra, libutad asikan
Agyang e me agkat, iduang ing kasaupan
Inia reng memaryu alang malakuan
Iyabut ing saup, alang kabayaran
Mipanantabe la, keta nang gagawan
Inia mayayakit ini nang masabal
Ngeni nang miliari kareng kayanakan
Ing tiru dang mayap, iyang kakalinguan
Kanya-kanya na la, mimiral katasan
Ampon singka biasa ala ing kababan
Dapat sang balikan itang milabasan
Pamulat karela, ing bie e makanian.