nang: PL Sergio Gramonte Calayag
Paninap a paninapan, kening isip susulapo
E matupad kapilan man, nung matudtud ing gawan mo
Panikuanan keni nang bie, ika’ng kimut, ika’ng galo
Ban kanita mamagumpe, pararasan kening bie mo
Kalupa ne’ng kukuang biabas, ika ining manalukyat
E maliaring manenaya, manabu ya o manakbag
Dapat ika ining kimut, manigobra saka gunyat
Ban kanita iyang akua, itang bunga a masampat
Agyang potang magaral ka, e mu basta ambisyun mu
Ing manigaral kang lisyun, ing bulakbul lilisyan mu
Itang tiyaga neng magaral, kayabe ing sakripisyu,
Kanita managumpe ka, ketang aburian mung kursu
Anti ka mong maniradol, ing paturan ya ing bulan
Ini metung a katutuan, e me turan kapilan man
Inia ika ing migising, keng e ustu mung gagawan
At kanita e bangungut ining tutu yang arapan,
Nung atin kang paninapan, panikuanan keni nang bie
Maninap kang makagising, yang gawan mu nung maliari
Akakit do reng mata mu, nung nanu ing maliliari
Deng sumbagal alilisyan, at ayabut ing tagumpe.
Nung mulat ka kaisipan, panigobran ing paninap
Ketang kekang kapagalan, iyang tutung maging ganap
Maninap kang makagising, ban kanita ‘yang matupad
E susulapo keng angin, e mu balu, nu ya miras.
(dakal salamat kang Nini U. Navarro )